Rheoli Ardal Gadwraeth Arbennig Bae Ceredigion

Mae'r term Awdurdodau Cymwys yn cynnwys unrhyw gorff statudol neu swyddfa gyhoeddus sy'n arfer pwerau deddfwriaethol, boed hynny ar dir neu ar fôr yn y DU.

Mae naw Awdurdod Cymwys a elwir yn Awdurdodau Perthnasol yn rheoli'r Ardal Gadwraeth Arbennig. Maent oll â phwerau neu swyddogaethau sydd yn cael effaith, neu a allai gael effaith, ar y safle. Tra na fo rhaid iddynt greu cynllun rheoli, mae pob un o'r Awdurdodau Perthnasol yn gyfrifol yn unigol am gydymffurfio â'r Rheoliadau Cynefinoedd o fewn eu cylch gwaith penodol. Serch hynny, gall yr Awdurdodau Perthnasol gyflawni nodau'r Gyfarwyddeb Gynefinoedd yn fwy effeithiol drwy baratoi, gweithredu ac adolygu Cynllun Rheoli ar y cyd.

I'r perwyl hwn, mae Awdurdodau Perthnasol y safle wedi ffurfio Grŵp Awdurdodau Perthnasol Ardal Gadwraeth Arbennig Bae Ceredigion. Nid oes unrhyw bwerau ychwanegol gan y Grŵp, ond mae'n sicrhau bod pob un o'r Awdurdodau Perthnasol yn cyfrannu at ddatblygu a gweithredu'r Cynllun Rheoli. Mae'r dull hwn o weithredu ar y cyd hefyd yn galluogi cyfathrebu'n effeithiol â phobl leol ac â phartïon eraill sy'n dangos diddordeb parthed y Cynllun yn ei gyfanrwydd. (Gweler y darlun isod i ddarganfod strwythur y cyd-gysylltiadau).

Fframwaith Cyswllt Ardal Arbennig Bae Ceredigion:

Mae Awdurdodau Perthnasol Ardal Gadwraeth Arbennig Bae Ceredigion fel a ganlyn:

• Cyngor Sir Ceredigion
• Cyngor Cefn Gwlad Cymru
• Asiantaeth yr Amgylchedd Cymru
• Dŵr Cymru
• Pwyllgor Pysgodfeydd Môr Gogledd-Orllewin Lloegr a Gogledd Cymru
• Pwyllgor Pysgodfeydd Môr De Cymru
• Awdurdod Parc Cenedlaethol Arfordir Penfro
• Cyngor Sir Penfro
• Gwasanaeth Goleudy Tŷ'r Drindod

Gweithdrefnau Cynlluniau a Phrosiectau
Un o'r offerynnau y mae'r Gyfarwyddeb Gynefinoedd wedi'u rhoi yn eu lle i reoli'r Ardal Gadwraeth Arbennig yw'r Gweithdrefnau Cynlluniau a Phrosiectau. Mae hynny'n berthnasol i unrhyw weithgaredd a datblygiad sy'n gofyn am ryw fath o gysyniad, caniatâd neu drwydded gan Awdurdod Cymwys neu Berthnasol. Os na ellir diystyru y gallai'r datblygiad gael effaith andwyol ar nodweddion yr Ardal Gadwraeth Arbennig, rhaid i'r Awdurdod Cymwys neu Berthnasol wneud Asesiad Priodol a chymryd cyngor gan yr asiantaeth gadwraeth natur statudol (sef y Cyngor Cefn Gwlad yng Nghymru) i bennu a ellir bwrw ymlaen â'r datblygiad, ac os felly, o dan ba amodau y gellir bwrw ymlaen.

Cliciwch yma i ddadlwytho'r Cynllun Rheoli (Pdf 7Mb)

Cliciwch yma i lwytho cylchlythyr yr Ardal Gadwraeth Arbennig i lawr yn ogystal â chrynodeb o'r Cynllun

Gellir dadlwytho copi o Gynllun Rheoli gwreiddiol 2001 drwy glicio yma